ДИР ГЬУДУЛ УМАРХIАЖИДЕ

 

УмархIажи вачIа цIадухъ гIодор чIун

Араб доб замана ракIалде щвезе?

ГIумрудул сухъмахъалъ цо-цо ккун сварал

РикIкIадал соназул бицен гьабизе.

 

РакIалда кколаан гьаб дунялалъул

Кавабазул кIулал кодор ругилан,

ТIадегIанаб зодоб цIикарал цIваби

ЦIан рахъун хъатIинир гьале  ккун ругин.

 

Заманаялъ нилъей бакIал каваби

Квер кIутIун рагьичIо ричIизе ккана,

ЦIвабзазде квелъ базе къасд карал кверал

ЦIадулал нухазда чамцIул  чIурхIана.

 

Къисматалъул бадир нахъе къачIого

ЧIваркьун ралагьана хIинкъи лъачIого,

ИяхI-намусалъул гъваридаб тIину

Ясберлъун цIунана хъублъизе течIо.

 

БукIана захIмалъи букIинчIо угьди,

Роххелги бихьана лъачIо пашманлъи,

Чияр къварилъуде мугъ сверун чIечIо,

Гьарун вачIарасе инкар гьабичIо.

 

КвачIида рахъарал карачелабалъ

Лъедолеб гамае канаб маяклъун

БукIана каранда бурулеб цIадул

РитIухълъуде бугеб бухIараб хIасрат.

 

Яшав-бечелъигун ккечIо гьудуллъи,

Дунял-гIаламалде букIана урхъи,

Щивасул рекIелъе каваби ричIун

Вацлъидул кьо лъезе кьуна хIаракат.

 

Херлъидул хIур чIвараб ботIрол хъахIаб кар

Заманаялъ бетIун риз гьабуниги

РацIадал къасдазулъ гьаб тIалъиялда

ЦIунараб хинлъидулъ нилъ жеги бахIар.

 

УмархIажи, цIваби чIегIераб зодир

Чирахъал киниган сун унел руго,

Канлъуде урхъараб гьаб сордоялъги

Бакъуе каваби къирулел руго.

Если заметили ошибку, выделите фрагмент текста и нажмите Ctrl+Enter