Нилъер росуцояв МухIамадрасул ХIайбулаев ккола Россиялъул хIурматияв нухал гьарулев чи. Школалдаса хадуб МухIамадрас улица л ьугIизабуна МахIачхъалаялъул бакIал раялъул техникум, хадубги Дагъистаналъул политехникияб институталъул бакIал раялъул факультет. Гьелдаса араб лъебералда щугогIан соналъ х!алтIулев вуго республикаялъул батIи-батIиял бакIазде нухал гьариялда. Цогиялъул бицинчIониги, ХIайбулаевас бетIерлъи гьабуна МахIачхъала - аэропорт ва Генуб - ЧIиркъатIа нухал рахъиялъул хIалтIабазе. Эркенаб заманалда, рекIелъ асар бижараб мехалъ хъвала МухIамадрасулица кучIдулги. Гьесул жугьабазулъ буго жакъасеб къоялъул къисматги, рорхулел руго инсанасул гIаданлъи-яхIалда хурхарал суалалги. Жакъа нижеца росуцоязул ва цогидалги адабият бокьулезул лъайхъвай гьабулеб буго МухIамадрасулил чанго кечIалъулгун.

М. Патахов,
секретарь Союза писателей РД

Бищана битIараб нух

 

Гьале гьанже щвана дун

Дирго бащалъиялде,

Бищунго гIумруялъул

Борхатаб мегIералде.

 

ГIодов лъугьинегIан цин

Цодагьалъго лъалхъилин,

Нахъа тарал нухазде

ЛъикIалан валагьилин.

 

РикIкIадго рукIун гьечIо

ЧIухIарал шагьра нухал,

КIичIарал сверсверарал

Гьал дир сухъмахъаздаса.

 

Добе борхалъиялде

ХутIунго гьечIо манзил,

Намусалъул бакIаб гьир

Баччизе ккечIебани.

 

Ратила церехунги

Нухал батIи-батIиял,

ТIамула хиялаца

Цо-цо васвасдизеги.

 

Амма ина гьабугьин

Дирго гьиралги раччун,

Аллагьасухъе бугеб

Бищила битIараб нух.

 

Таргьа цIун гIарац гьечIо,

ГIалах цIун боцIи гьечIо.

ЦIвакцIвакараб «Мерседес»

Машина къотIноб гьечIо.

 

Чанго тIала тIадги бан

ТIубанго хъала гьечIо,

Хъаравулзабаз цIунун

Щогьаз ине ирс гьечIо.

 

Къеда бан ярагъ гьечIо,

Къаданиб ханжар гьечIо,

Хирияб къайи, цIарагI

ЦIунараб гъамас гьечIо.

 

Гъасда цДаялде юссун

Сабурай гьудул йиго,

Суалал лъугIуларел

Лъималазул хъуй буго.

 

ВачIарав гьоболасе

Гьабурабго квен буго,

Кидаго рахай бачIеб

Рагьараб каву буго.

 

Гьарун мискин вачIани,

Садакъа къачIан буго,

Къо ккарасе хIалае

ХIадураб кумек буго.

 

ХIалимаб гIамал буго,

Пемераб рокьи буго,

КъвакIараб - ракьа гIадаб

КъуркьичIеб чIухIи буго.

 

Бичасе икрамалъе

Какикь тIамун тIом буго,

ТIокIабги кинаб талихI –

Тани гьадинги гIела.

  ***

 

 

ЦIакъго къалъун буго

Жакъа дуниял,

БатIияб кьер буго

Ракьалда рещтIун.

 

Рорхалъи мугIрузул,

Зодил хъахIиллъи,

ГIурул макъаналъул

Паналъи жакъа.

 

Бицизе лъалареб

Паналъи буго

Дир каранда рещтIун

Щаяли жакъа.

 

Хисун гьечIо добго

Дуниял буго,

Дир беразда цебе

Бан буго пардав.

 

Хисун гьечIо щибго,

Дун хисун вуго,

Жакъа дун гьудулгун

Данд чIвазе вуго.

        

  ***

Боржун анна тIавус,

ТIерхьана дир бакъ,

Хадур ритIаралго

ХутIана кверал.

 

БецIлъана сверухълъи,

Свана берзул нур,

БачIинаро тIокIаб

ТIад буссун талихI.

 

Ургьуге гьинал ракI

Гьеб дур унтуе

Батуларин сабаб,

Юссуларин дой.

 

Зигардуге лага,

Гьеб дур гарбида

Гургинал гъуждуца

Жемуларин къвал.

 

           ***

Щибаб къоялъ радал

Дица ритIула

Дуе бакъул чIорал,

РачIулищ духъе.

 

Бакъул къоялъ къаде

Дица регьула

Духъе гьорол кверал,

Квалквалиш дуда.

 

Къаси цIваби ракун

КунчIараб мехалъ

Гьеб дир чIалгIен буго,

БичIчIулищ дуда.

 

Дур сверухълъиялда

Бугеб берцинлъи

Гьеб дир рокьи буго,

Божуларищ мун.

 

           ***

Гьудулалъул кечI

 

Гьурмада сабру буго,

Черхалда сири буго,

РикIкIадаб сапаралда

ВуссичIого рос вуго.

 

Хванилан хабар буго,

Хобго гьечIилан буго.

Гирун-гирун бачIунеб

Бадиса магIу буго.

 

Пашманал кьераз росун

Вацазул гьурмал руго,

БотIрода ругел расал

ТIутIун ралей яц йиго.

 

Рукъалъул букIоналда

КIудияб гIазабалда

ХIалго лъазе теларин

Тату хварай дун йиго.

 

Гьанже-гьанже къалъараб

ГIумру къварилъи бачIун

Бичаасул къадаралъ

Къокълъилеб гIадин буго.

 

Огь, тIадегIанав Аллагь,

Сундулниги бетIергьан

Вусинаве дир гьудул,

Я дирабги босе рухI.

 

"Анчих" №4 декабрь 2010 года

Если заметили ошибку, выделите фрагмент текста и нажмите Ctrl+Enter